Түркістан өңірінде жетінші жайлы мектеп ашылды

Салтанатты ашылу рәсіміне Түркістан облысы әкімінің орынбасары Бейсенбай Тәжібаев арнайы қатысып, жиналған жұртшылықты құттықтады:

«Өңірімізде 29 жайлы мектептің құрылысына қоса, облыстық бюджет және басқа қаржы көздерінен 21 мектеп салынып жатыр. Бұл 50 мектеп пайдалануға берілгенде, апатты жағдайдағы және үш ауысымды мектептер мәселесі толығымен шешіледі. Облысымызда білім саласына ерекше көңіл бөлініп отыр. Біз оқу-тәрбие жұмыстарына қолайлы жағдай жасау үшін барлық қажетті шараларды қабылдап жатырмыз. Сонымен қатар, мектептердің аумағы мен ғимарат ішінде оқушылардың қауіпсіздігі толық қамтамасыз етілуде. Биылғы жылдың өзінде мектептеріміз бейнебақылау, дабыл, FACE ID жүйелерімен жабдықталып, полицияның жедел басқару орталығымен интеграцияланды».

Ұлттық жоба стандарттарына сай тұрғызылған жаңа мектептің мүмкіндіктері кең:

• асхана, кітапхана және арнайы оқу залы;
• шеберхана, акт залы және медициналық пункт;
• бейнебақылау камералары мен заманауи өрт қауіпсіздігі жүйесі.

Мектеп заманауи пән кабинеттерімен, оның ішінде робототехника, кең жолақты интернет және жаңа модификацияланған кабинеттермен жабдықталған. Мұнда оқушылардың сапалы білім алуына барлық жағдай жасалған.

Айта кетейік, бұл білім ошағы ұлттық жоба аясында облыста жоспарланған 29 нысанның жетіншісі болып отыр. Жыл соңына дейін түркістандықтарға тағы алты мектепті тапсыру жоспарланған.